Kynge Alexander moost dere sone I tell the certaynly that yf ony make greter expence than his relme can susteyne, that he enclyneth to folysshe largesse & avaryce. Suche a kynge without doubt shalbe destroyed. But yf he inclyne to lyberalyre, he shall have perpetuall glory of his realme, yf he drawe hym fro takynge the goodes and possessyons of his subgectes. And wyte thou dere sone that I fynde wryten of a grete doctour named Hermogynes whiche sayth that the gretest & soverayne goodnesse, bryghtnesse of understandyng, & plente of lawe, scyence & perfeccyon of a kynge, is that it behoveth to kepe hym fro takynge of the goodes and possessyons of his subgectes. It hath ben the undoynge of many realmes. For dyvers kynges have made greter & outragyous expences than the stynt of theyr realmes coude extende, wherfore they toke the goodes and landes of theyr subgectes. For the whiche injuryes doynge the people cryed to god, whishe sent vengeaunce on the sayd kynges. In suche wyce that theyr people rebelled agaynst them & put them to destruccyon. And without the grete mercy of god that susteyned them the realmes shold have ben utterly destroyed with the people. Thou then oughtest to absteyne the from outragyous expences, & ought to kepe temperaunce in lyberalyte. And gete not the derke secretnesse & reproches that thou shalt have, for it belongeth not to them that be good.