The substaunce of all vertuous reygnyng is to gyve to them that be good, & perdon injuryes, honoure & bere reverence to them that be worthy, & have mynde of them that be meke, & amende the defawtes of them that be symple, & with good wyl save the people, & kepe the fro to moche spekyng, let injuryes pass tyll thou se the tyme of defence that thou knowe not the foly of foles. Dere sone I have taught the & shal teche the many thynges the whiche thou shalt kepe in thy hert. And I ensure the that the sayd techynges shall always be there in al thy doynges & werkes. Bryght & suffycyent scyence of physyke shortely comprysed thou shalt have. And I wolde never have shewed the ony thynge, but that the sayd scyence with the techynges that folowe ought to suffyse the & thy werkes in this worlde and in the other.