Swete sone Alexander it is a goodly thyng precyous, and honourable whan the kynge speketh but lytell. But yf over grete nede requyre it. It is better that the eeres of the people be wylling to here the wordes of a kynge, than to be wery of his to moche spekyng. For whan the eeres be glutted with the kynges speche theyr hertes be wery to se hym. And also the kynge ought not to shewe hymselfe to often to his people, nor haunt to moche the company of his subgectes, & specyall of vylayns. And therfore the Yndyens have a good custome in the ordynaunce of theyr realme. For theyr maner is that theyr kynge sheweth hymselfe but ones in the yere. And than he is clothed in vesture royall. And all the barons and knyghtes of his realme ben rychely armed and arayed about hym. And he is set upon a stede the ceptre in his hande armed with ryche armures royalles, and all his people a good way before the barons & other noble men. And ther they shew the dyuers perylles & adventures that be passed. And how that he & his councell is well ordred. And the kynge as than is wonte to pardon grete offences to some of them. And whan the parlyament is ended the kynge setteth hym in a chayre & anone ryseth one of the moost wysest men & speketh to the people, praysyng & commendyng the wyt & good governaunce of the kynge. In yeldynge thankes to god that hath so well ruled and maynteyned the Yndyens kynge, & that they are pourveyed of so wyse & honourable a kynge to reygne & guyde them. And then he confermeth the sayd people in one wyl & courage to the obedyence of the kynge. And then he commendeth the people & aloweth them gretly of theyr good maners & condicyons which be reporteth do them. And sheweth them goodly wordes & examples, the better to put them in grace & obeysaunce, with mekenesse in the good wyll of the kynge. And whan this wyse prynce hath thus spoken, the people enforce them to exalte the praysynges, and commendacyons, and good maners of this sayd kynge, in prayenge god hertely for hym. And by this meane by theyr good maners and wysdome of theyr kyng they cause countrees and cytees to be obedyent to them. And thus ben the chyldren brought up in theyr youth, & taught in the honoure and revernence of the kynge. And the good fame of the kynge secretly and manyfestly is spredde and knowen. And the ryche and poore ben therby susteyned thoroughout the realme of Ynde. And the kynges possessyons and trybutes encreaseth therby.