Sothly it is besemynge to a kynge to take his pastyme and sporte with his prynces and lordes. And that he have many and dyvers maners of mynstrylles, and syndry instrumentes, daunces and songes. For the humayne creature naturally anoyeth. And in suche instrumentes and pastymes nature delyteth & the body taketh force & vygoure. Than yf thou wylt delyte in suche thynges, do it the moost honestly & secretly that thou mayst. And whan thou arte in thy pastymes beware for drynkynge of wyne. And let the other sporte them as longe as they lust. And than thou shalte have many secrets dysclosed. And make not this pastyme often, but twyse or thryse in the yere. Also it behoveth the to have nyghe to the some of thy famylyer servauntes that shal tel and reporte to the what is sayd in the realme. And whan thou arte amonge thy barons & subgectes, honoure wyse men & bere reverence to every man as they be worthy. And every man in his estate, mayntene & let them ete with the somtyme, one after another. And gyve gownes somtyme to one & somtyme to another, after theyr estate, and as they be worthy. And in ony wyse se that there be none of thy knyghtes & famylyers, but that he fele of thy lyberalyte & of thy grace. And thus overall shall appere thy largesse & gretnesse of thy courage and honour.