Noble kynge Alexander, forgete not to take tarte syropes in the mornyng fastynge when flewmatyke humours habounde to moch. For it is proufytable & wasteth them moche. Also I mervayle that ony man may dye or be seke that eateth breed of clene and good wheat, holsome & good flesshe, & drynketh good wyne of grapes temperatly. And yf he kepe hym fro to moche drynkyng, eatyng, & travayle. Yf sykenesse overcome such a man he must be healed as a dronken man. That is to wyte he must be wasshed with warme water, and than set over a rennyng water betwene .ii. grene wylowes, & his stomake anoynted with an oyntement of sandres, or sandalles, & have a fumygacyon of frankensence: & other swete spyces, & it wyl do him hoch good. And yf ony man wyll forsake holly the drynkyng of wyne he ought not to leave it sodeynly at ones but lytel & lytell, & to mengle it every day with water more & more, tyll at the last there be nothynge but clere water. And so he may kepe his helth & good complexyon. Thus governe thy body yf thou wyll lyve longe. And kepe my doctrynes, & consydre these thynges folowynge wherein nature conforteth gretely. That is to wyte: Goodly pastymes, syght of grete rychesses, grete reverence, vyctory over enemyes, fedyng on good meates, noyse of mynstralsy, syght of precyous garmentes, often herynge of good tydynges, speche of wyse men, to enquere of thynges past and to come, and communycacyon with fayre gentylwomen.