Myghty emperour the messagers alway sheweth the wysdome of hym that sendeth them. They ben the eyes, the eeres, & the mouthe of theyr lord. It behoveth for thy messagers or ambassadours to chuse suche as ben moost suffycyent, of clere understanding, wyse, honourable, & trusty, which loveth thy honour, & hateth thy dyshonour. (For in thy court thou mayst finde them bothe.) And yf thou fynde suche discover & shewe thy courage to them. And if thou fynde none suche or better, fynde one that wyll trustely bere thy lettres, & brynge the an answere of them. And yf thou fynde that messager be covetous to do his owne prouffyte & to gete gyftes, truste not in hym, but entyerly forsake hym. And also make no man thy messager that wyll be dronke, for by suche one it shall be sayd & knowen that the lorde is not wyse. And ferthermore make not thy messager of thy gretest offycer, & lete hym not be ferre from the, for it may well be the undoyng of the & the realme. And yf thou sende messagers by whome ony treason come to the, I tel the not the measure of payne tat they ought to suffre, but do therin as thou semest best.