For the begynnynge of largesse that a kynge ought to have, is to have good fame, wherby the grete realmes & grete lordysshyppes be goten. And yf thou desyrest to get realmes of lordysshyppes, yf it be not by good fame, thou shalt get none other thynge but envy. And envy bredeth lesynges, whiche is mater and rote of all vyces. Envy bredeth yll speche, yll speche bredeth hate: hate bredeth injustyce, injustyce bredeth batayle, batayle breketh all lawe, dystroyeth cytees, and is contrary to nature. Than thynke dere sone & set thy desyre to get good fame, and thou shalt have in the trouth, & all thynges laudable, for it is cause of al welth. For it is contrary to lesynges, whiche is mater of all vyces, as it is sayd. And trouth engendreth the desyre of Justyce. Justyce engendreth good faythe. Good faythe engendreth famylyaryte. Famylyaryte engendreth frendshyp. Frendshyp engendreth councel and helpe. And for this cause all the worlde was ordeyned, & the lawes made which be covenable to reason and nature. It appereth than that the desyre to have good fame is honourable and perdurable lyfe.