Somer begynneth whan the sonne entreth the fyrst poynt of the crevyce, & lasteth .xcii. days, & an houre & a half. That is to wyte fro the .x. day of June to the .x. day of september. In this season the days be longe, & the nyghtes short. And in al regyons encreaseth & abateth theyr heate & the see is calme, & the ayre meke & fayre. The flours wyther & serpentes encrease & shed theyr venym, & sprede theyr strengyh. The myghtes of mannes body be fortyfyed. And al the world is ful of welth, as the fayre bryde that is goodly stature & in perfyte aege. The season of some hote & drye, & than coler is moeved. And in this season is good to beware of all thynges that be hote & drye of complexyon. And take hede of to moche eatyng or drynkynge for therby is the kyndly heate quenched. In this season eate meates of colde & moyst complexyon, as veale, mylke with vyneygre, & potages made with barly meale. Eate fruyt of eygre savour, as pommegarnets, & drynke small wynes, & use not the company of women. In this season lete the not blode, but yf grete nede compell the. Use lytell travayle, & seldome bathynge.