Hervest entreth whan the sonneth fometh in to the fyrst degre of the balaunce & lasteth .xci. dayes & an houre & a halfe. That is to wyte fro the .x. daye of Septembre to the x. daye of Decembre. In this season the day & nyght be of one length. And than the dayes waxe short & the nyghtes longe. The ayre is derke, & the wyndes entre the northern regyons or septentryon. The wether chaungeth, & the ryvers & sprynges waxe lesse. The orcheyardes & fruytes wydreth. The beaute of erthe fadeth. Byrdes cease theyr syngyng. Serpentes seke theyr holes wher they assembled theyr lyvyng in somer for the tyme of wynter. The erthe is as an olde naked woman that gooth fro youth to aege. This season of hervest is colde & drye, this tyme blacke coler is moeved. In this season is good to eate meates that be hote & moyst as chekyns, lambe, & drynke olde wynes, eate swete reasyns. And kepe the from all thynges that brede blacke coler, as lyenge with women more than in somer, nor bath ye not but yf grete nede requyre it to be done. In this season yf a man have nede of vomytynge, do it at none in the hotest of the day. For at that tyme all the superfluytees of mannes body gadreth togyder. Also it is good to purge the bely with a medycyn ordeyned therfore & other thynges that ben to expulce blacke coler & to refrayne humoures.