Wynter cometh whan the sonne entreth the fyrst degre of the sygne of Caprycorne & lasteth lxx. dayes & an houre & a halfe. And begynneth the .x. day of Decembre, and contynueth to the .x. daye of Marche. In this season the nyghtes be longe & the dayes short; it is veray colde. The wynes be in the presse, & the leves fall, & herbes leeseth all theyr strength, or the moost parte. All bestes hydeth them in caves and pyttes of hylles. The ayre and the wether is darke. And the erthe is lyke as olde decrypyte persone, that by grete aege is naked and nygh to the deth. Wynter is veray colde and moyst, & than behoveth the use hote meates, as chekyns, hennes, motton, and other hote & fatte flesshe, eate fygges, nuttes, and drynke grene wynes. And beware of to moche laxe and bledynge, & eschewe company of women, for it wyll feble thy stomake, and bathes be good. And for the grete colde the natural heate entreth in to the body, and therfore the dygestion is better in wynter than in somer. And in hervest the bely is colde, and than the poores ben open by heate of the season, and reproveth the naturall heate of all the partes of the body. And therfore the stomake hath but lytel heate, wherby the dygestyon is febled, and the humours assemble there.