The fourth parte of the body ben the genytours. Yf superfluyte & noughty humoures gadre in them thou shalt knowe it by these sygnes. The appeytye wyl waxe colde, & reednesse wyll appere upon them & upon the share. Than must thou take a sede called Apij with fenell sede & the rote of mugwort, & of another called Acham, & atracies. And with these herbes put the rotes in good whyte wyne, & drynke a quantyte of it every mornyng with a lytell water & hony & eate not moche after it. And yf thou do not thus thou shalt have payne in the bladder, & lyver, & shalt not pysse, & shalt have grefe in the intrayles and lunges with brekynge of the stone. Swete sone Alexander I have rede also the hystoryes of a myghty kynge, whiche assembled all the best phylosophres that were in Ynde and Grece. And commaunded them to make a medycyne so prouffytable that he sholde nede none other for his helth. The Grekes sayd he that drynketh every morning twyse his mouthfull of warme water shall have a good ende, and shall nede none other medycyne. The physycyens of Ynde sayd that it is good to eate every day fastyng a quantyte of greynes of whyte hony. And me semeth that who so taketh one of these sayd medycynes by reason shall not have payne in his wombe, nor ought not to feare palsey, nor gowte, nor ache in his Joyntes. And who so eateth every mornyng .vij. dragmas of clustres of swete wyne grapes, shall not feare the dysease of flewme, and it wyll amende his mynde, and claryfy his understandynge, and he nedeth not to doubt fever quartaynes. And who so eateth in the mornynge a fygge with nuttes and a quantyte of leves of rue, that day shall not nede to feare venym.