The nature of wyne that groweth on mountaynes nygh to the sonne is dryer than that, that groweth on the playne grounde, in moyst places, & shadowes. Wyne is good for aeged people, and such as by moyst & flewmy. And enoyeth them that be yonge and hote. And wyne warmeth & delyvereth colde and cours superfluytees. The reeder and thycker that wyne is the more it bredeth blode. But yf it be stronge and bytter, than it is called the fyrst blode and the fyrst nourysshyng, and hath the nature of drynke and medycyne. And often dronken it noyeth the body and nouryssheth it not. And whan wyne is naturally swete, it noyeth the stomake with smellynges and wyndes, but such wyne is comynly swete of complexyon, and suche as groweth in large feeldes stretchynge towarde the mountaynes and valees havynge swete clustres, & rype, and be not gathred tyll the myght of the substaunce of the bery is gone with the moystnesse, and that the vyne and the grape be somewhat wydred. And thou shalt knowe that wyne ought to be of an eygre taste sharpe and pleasaunt, and have thycke lyes on the botome of the vessell, and fayre and clere above, & whan thou hast fayre and good wyne drynke temperatly therof to the ease of thy body, as the tyme requyreth. For it strengtheneth the stomake and the heates of the body, and helpeth dygestyon and kepeth frome corrupcyon, and rypeth the meate in the membres, puryfyeng it, & worketh in them tyll it be conjunct in good blode, & nourysshynge, and travayleth and reyseth the heat of the body temperately. And kepeth a man sure of wycked humours, it gladdeth the hert, & maketh fresshe colour in the face. It quyckeneth the mynde & soupleth the tongue, & destroyeth all melancoly, & make a man bolde, & to have good courage & appetyte. And hath many other good propryetees. But yf wyne be outrageously taken many inconvenyences come therby. It troubleth the brayne, the mynde, the wyttes, the understondynge. It maketh the vertue of natural heate wylde, & causeth forgetfulnesse. It combreth the tongue & weyketh all the synewes & lymmes of the body. It maketh the eyes reed & blered. It chaungeth the colour, & destroyeth the body, & maketh cours & noughty blode. It marreth dygestyon. It causeth to many wordes, & to moche slepe. It maketh the mouth stynkynge. It letteth the goynge, & dystroyeth the sede of man & bredeth lepry, Beware therfore that thou drynke not wyne outrageously, but moeve & chaunge the nature therof with rewbarbe which causeth the lyver to lyve. And wyne with Rubarbe hath many vertues as is founde playnly in bokes of physyke. Howbeit Rubarbe & wyne be bothe deedly venym yf they be outragyously taken. And surely all evyls cometh of wyne unmeasurably dronken.