Most worthy sone it is good that a kynge have lyberalyte, goodly gesture, and countenaunce, & that he laughe not to moche. For overmoche laughyng causeth many to be lesse set by, and to be lesse honoured. And fynably overmoch laughyng maketh a person to seme older than he is. Also a kynge ought to love his people in his courte and of his councel more than in other partyes. And yf ony do vylany to another, he ought to punysshe hym as he hath deserved, that other may take example therby, and eschewe them from yll doynge. And in that punysshynge thou ought to regarde the persone that hath done amysse. For elles sholde a hyghe & noble man be punysshed as another. And yf thou do so thou shalt not be alowed of the people. And it is good somtyme to do rygorous & strayt Justice, & somtyme noe, to thende not that dyfference of the persones be knowen. For it is wryten in the boke of Machabees that a kynge ought to be praysed & loved, yf he be lyke the eygle, which hath lorshyp over all fowles. And not as he which wyll be lyke another foule that is subgecte to the eygle. Wherfore yf ony do vylany to ony other in the presence of the kynges mageste, it ought to be regarded & consydered yf the offence were done in game or for to cause the kyng to laugh, or to make hym or other glad of it, or yf he dyde it in despyte, & shame of the mageste royall. For the fyrst dede he ought to be correcte, and for the seconde to suffre dethe.